好啦，係我錯，我以為2017年，boarding pass係可以直接scan電話個bar code。錯哂啦，人類雖然已經去過月球，可以唔開刀做微創手術，甚至對量子力學都有一定嘅認識，但，boarding pass，仲係要列印出來。
但錯嘅又唔止我一個。當我1300 call好fedex，save埋份minutes，九秒九離開公司衝落去搭地鐵去中環站轉機場快線，果頭仲諗緊張機票先八百幾蚊，搭機場快線又用咗百幾蚊，條數點計先，果頭又已經到了。一落車，機場的工作人員叔叔問我咩機，我俾電話boarding pass佢睇，佢話我冇野寄可以直接去離境大堂。
結果呢，我就俾入境處的姐姐叫我行番去terminal 2整番張「傳統的」登機證。
行到過來自然又係排，好在online check in條隊快好多。好不容易終於過海關。因為我都是第一次唔寄艙，而揹哂d化妝品、洗頭水係身，所以都有d淆。上網睇過每支唔可以超過100ml，然後用黃加藍變綠裝好，過關比想像中快，拎都唔駛拎出來，直接過就得。👍
來到離境大堂，少不免又係食Popeye個咸味鬆餅，有時我甚至覺得，我常常咁渴望去旅行，部份原因都係要食呢個鬆餅。
食完鬆餅，開埋戶口海外ATM設定，買埋水，行到去閘口仲諗住叉下電，原來已經上得機了。所以說，早兩個鐘來機場真係必須。
好地地飛機點解要叫叉燒包？你會唔會叫叉燒包做飛機？
未起飛已經訓著左，但好在後來醒一醒，空姐問Are you from Thailand，答了Hong Kong，差d冇得拎Arrival form 😂
清萊時間1815左右就落機，心諗咪仲趕得切睇鐘樓個幻彩詠清萊！少年真係太天真。落左機，自然就係排入境，見到truemove就係度賣緊sim card，7 Days 200B，諗住都ok啦但，唔對路啊說時遲那時快，過關條隊長左咁多既！本著「我就唔信出到去冇」的心情，死回過去排番已經長咗好多嘅隊。清萊機場都算有先見之明，提供兩個鐘免費wifi，原來真係用得著的。
好不容易終於過了關，出面竟然得一檔賣sim card，7 days 249B⋯真是肉隨砧板上。其實看檔的妹妹都已經做到唔停手，但實在太多人排，佢仲又要逐個影passport，入左card仲要搞一大堆setting⋯ 總結是，到我真正離開機場時，已經是1920左右。
Welcome to Chiang Rai。清萊機場好像比清邁機場仲細d，而且好像不見有的士站。我出了門口，有幾個司機向遊客招徠，我向其中一個出示了hostel地址，他開價200B，我便跟他上了車。
上車後有一刻想過如果他要車我去賣豬仔我便死了，慌忙開google map看看自己身處的位置，確認他是不是正向著hostel的方向駛去。結果自然是虛驚一場，反而有點覺得這樣猜度人家很過意不去。司機問我明天去哪裏，我說清盛吧，然後我們經過巴士站時他還提我：明天你就在這裏乘巴士到清盛啊，從hostel走過來很快。
我真是小人之心。
我今次住的是這間Happynest Hostel。離清萊夜市約五分鐘步行的距離。雖然只是一間小小的hostel，但在各網站評價都甚高。我出發前看過有三間心水的，有一間目前正在搬遷不開放，另一間看起來會有很多四腳蛇我怕到時連夜大呼小叫被趕走，所以最終選了這間。但我怎麼會以為這間就沒有四腳蛇呢？
還未行到房間，大批四腳蛇已在等候著我。我只好硬著頭皮，誠心祈求房裏沒有四腳蛇。
幸好沒有。房間算十分乾淨清潔。雖說是六人房，但這晚只有我，因此我可以優先選床。我本來覺得睡上架床較好，在上面自成一角不怕被打擾，但一想到天花板可能會有四腳蛇掉下來，最終我還是選了下架床。
環境很不錯吧。
Hostel提供lockers，你要自己帶把鎖去，但其實也十分方便。整頓好，就要出發去夜市了。我要買沐浴露、牙膏、防曬，以及…SD card。
7-11有各種便宜而看起來可靠的旅行裝日用品。
買SD card完全是出於我自己智障，出發前沒有檢查清楚，到埗後才影了一張，它竟然就跟我說已經full了。我走進一家照相館查詢，掌櫃說有32GB，然後桌下有東西在動…我才發現有人(應該是他太太吧)正躺著，她把手伸進櫃拿了把鎖匙給他，他打開發黃的櫥櫃門拿出SD card給我看，開價1500B。
太貴了。我謝過他們便離開。轉角有間7-11，進去問，那位像泰劇主角的店員弟弟叫我去泰航旁邊專賣電子用品的店看看，那裏應該有。
買是買到了，但已花了650B，我明天又要重新換錢了。
清萊夜市我兩年前來過，其時在此處見過一個頭髮卷曲、棕色眼睛水汪汪、大約四五歲的小女孩向遊客討錢。我們當時在這間雪糕店請了她吃朱古力雪糕，然而時至今天我仍不知道到底這樣做對她好處還是壞處更多… 再次來到這兒，卻見不到她，一方面希望她已得到援助、上學讀書，一方面卻怕她命途更坎坷…
晚飯。清萊夜市有個像food court的地方，你點了食物、飲品，可以坐著一邊吃一邊欣賞歌舞表演，像俗語說的十分chill。我點了青木瓜沙律、炒芥蘭、啤酒，神經開始鬆弛下來。
鄰桌的洋人探過頭來，問道：青木瓜沙律好吃嗎？我說好吃啊，然後便談了幾句。他已經去過老撾、馬來西亞等地，又說去過中國幾個地方，但未來過香港。
"Is Hong Kong China?"
"Just Hong Kong. Like Barcelona maybe?" 他說oh ok。
趁商舖未全關門，我趕忙去逛一逛。泰北有各式各樣的紡織品，價廉物美。縱然未學會分辦哪種花紋是拉鈷族、哪種是苗族，我總是喜歡穿戴他們的衫袋。
最終買了這個150B的斜孭袋和220B的長褲。賣袋的店主最初以為我是泰國人，一直跟我說泰文。這種情況在我一家人很常見，她最後竟主動降我價，由原價160B降至150B。
泰國褲我其實已有很多，但這條腰間民族紋、下身淨色綿質鬆身真的好吸引，感覺襯高跟鞋還可以上班，所以忍不住買了。
買齊了裝備，我沿著沒有街燈的街道、刻意與佈滿四腳蛇的牆保持著距離，急步回旅館休息，準備明天一！個！人！往！清！盛！
下格床也可以有四腳蛇爬上來 :P
ReplyDelete你又啱
Delete